علامة على الطريق
خليت علامة على الطريق
و ثبته رسمك فى القلب
زاهى و مرح..
رحلت بى حلمى الجريح
و عارف هواك جواى
كبير ما بنجرح
مسكون بى عشقك
متيمن مشيت و لوحت ليك
مبهورة العيون بحرير السفر
و أنا بالى فيك
شهّدت النيل و التراب وصلاتى ليك
وعداً على أمشى و أجيك..
ما تحزنى
بكرة ابتسامتك تعود
تملأ المشارق بالبريق
ما بخاف عليك و أنا فى الغياب
التراب الفيكِ من معدن صمود
ما بفنى، بس بفنى الحريق
و تفضل علامة على الطريق
تضوى الغربة لى خطوات
ساهيات بعيد، شان يرجعن
و مسارات الصبر تفرهد طرب
و تضج بالرحيق..
و ينزل من مسامك بلسماً
يروى الأرض و يطيب الجرح العميق
مكتوب نعود
نبنيك ذى ما بتحلمى
تمضى الدموع
و يرفرف الفرح الرشيق..
أصلوا العلامة على الطريق
وطن عزيز ساقيهو نيل
و تبقى العلامة على الطريق
عزة و شرف و أصل نبيل
و تبقى العلامة على الطريق
جنة بى أطفال سمر
راجيهم مستقبل جميل..
---------------------------------------------------------------------------------------------
مجموعة "أغنيات للحب و الوطن" . .. ... .... 2009..... (Lyrics)
No comments:
Post a Comment